Am rächtä Talhang gläägä, uf 1850 bis 2000 Meter uber Meer, wird diä Alp vu heechä Bärgä wiä dä Schächetaler Windgällä, em Schwarz Schtock und em Alpler Schtock umgää. Uf d Alp chunnt mä vu dr Ürner, aber äü vu dr Schwyzer Sittä.
Ganz i dr Neechi liit dr Alplersee. Det cha mä gäbig äs Zniini ässä oder im Summer, wenn s häiss isch, äü äs Bad näh. Alplä isch ä gmischti Alp, das häisst, hiä sind Chiä, Rinder, Gäiss und Schaaf drüf.
Näb em tradizionellä Alpchääs wärdet äü Mutschli mit verschidenä Gschmacksrichtigä produziärt. Im Witerä git äs hiä äü nu diä sogenanntä Alp-Formaggini.
«D Gäissä uf Alplä hent mängisch schwäär a dr „Gelti“ glittä. Eerscht, wo dr Hirt äis vu denä chrankä Tiärlänä ohni lang umäzlüägä verbrennt häig, da sig zwar äs firchterlichs Hagelwätter cho, aber drnaa häig äs Rüäw ggä.»
Ürner Sagäwält